دا شعب فقري/ احمد فؤاد نجم

نظرا لان النعمة فاقت حدها

و لاننا مش قدها

ولان فعلا انجازاتك

فوق طاقتنا نعدها

ولاننا غرقنا في جمايل

مستحيل حنردها

نستحلفك...نسترحمك

نستعطفك ...نستكرمك

ترحمنا من طلعت جنابك حبتين

عايزين نجرب خلقة ثانية

ولو يومين

اسمع بقى

احنا زهقنا من النعيم

و نفسنا في يومين شقا

عايزين نجرب الاضطهاد

ونعوم ونغرق في الفساد

بيني وبينك حضرتك

دا شعب فقري ما يستحقش جنتك

انا عارفه شعب ما ينفعوش

الا شارون وبلير وبوش

عايز يجرب الامتهان

و يعيش عميل للامريكان

بيمد"غازه" لاسرائيل

و يومين كمان ويمد نيل

اهو يعني نشرب ميه واحده

ندوب في بعض

ماء ماء ماء

ونفض سيرة الانتماء

وبلاها نعرة وطنطنة

تبقى البلاد مستوطنة

متسلطنة بالسرطنة

ايه اللي خدناه م الكرامة و الاباء

حبة خطب و كلام...كلام

احنا راهننا على النظام

و رضينا بخيار السلام

بخيار حنسد عين الشمس بيه

علشان ما يطلعش النهار

و يطلع لمين؟

حبة معارضة مغرضين؟

وحسب بيان السلطة

شلة ماجورين؟

يا عم فضك سيرة

وارضى بقسمتك

دا شعب مش فاهم اكيد

يالا اطرده من رحمتك

و ان كنت غاوي الحكم

خليك مطرحك

حاغطس واقب و اعود

بشعب يريحك

راضي وعمره ما يحرجك

اخرس و ما يسمعش

واعميلك عينيه

مش كل قرش يبص فيه

ما يقولش لاه,وفين وليه

يضرب ينفض في السليم

وعلى الصراط المستقيم

كل اللي يغرق ينطقه

عاش الزعيم

مات الزعيم