ما اشوم عمرك ها ولى رزام

لوغة النهضة قبل الاتتخابات ولغتها بعد الانتخابات طلعت كيف لغة الراجل قبل الزواج يعني الخطوبة وبعد الزواج.شي يفجع دارو 180 درجة ولات خلافة واشارة ربانية وتكفيير وتحليل الحاصيلو شي يكوخر.انا حكاية النهضة وتونس فكرتني بحكاية البهيم حاشاكم و البهيمة حاشاكم زاده.قالك سي البهيم حب يشكل ويركح البهيمة ياخي ولى يتحكك ويتلمس ويفدلك عالبهيمة او في الاخر قالها اخزر حتى الماعون متاعي صغير.خممت البهيمة شوية او وافقت.ايا كيف استفعل فيها لبهيم قاتلو تي هاو كبر ماعونك قالها سي البهيم :ما اشوم عمرك هاو ولى كالرزام. تونس صارلها كيف البهيمة والشي ولى يخوف.

اخدم ا ضك كول الخرشف

حالة زعمة خليقة ولا صنيعة.انا بصراحة ضد النهضة وضد افاق ونيوليبراليزم بصفة عامة.يا صاحبي برنامج النهضة الاقتصادي يفجع .ملا انفتاح وحلة بطول والعرض على الستيل لامريكان و التراك.يا خويا بصراحة انا ضد الترك والسلطان العثماني وتونس قادرةتكون خير مالترك والامريكان.يا خويا ما حاجتناش بقروض رجعولنا فلوسنا والا الغيوا ديونكم السابقة.اما يظهرلي يلعبولنا في لعبة فرانسامع البي شيخو بالقروض وكيف يوحل يجيو يهزو مالهم بيديهم .هاك علاش نقوللكم لا النهضة ولا بادب ولا سليم الرياحي)حريري تونس( باش يسلكونا الحل اخدم ارضك كول الخرشف

POUR LENNA : j'etais solidaire avec toi contre la censure et je resterai solidaire avec toi

يا عمار لينا راهي لينا و الي يمسها بمقص نقصولو عروقو باقلامنا

البارح في صفحتي متاع الفايس بوك نشرت المقال متاع لينا الي نشراتو ري 89 نهار 11 فيفري والي أوردت فيه استنكار المدونين التوانسه للحجب الذي يتعرضلو المدونين والي اخرهم طارق الكحلاوي، ياخي ليوم تحجبت مدونة لينا.شي يهبل

dimanche 7 février 2010

صرامنا في بعضهم

ما نعرفش علاش تفكرت لحكاية الليبية هاذي.تذكرتها كيف ريت الدنيا قامت وما قعدت على فيلم والا يمكن تذكرتها كيف ريت الناس هاجت على حوار اذاعي بين الطالبي مورو.والا تذكرتها كيف ريت عباد هادا بسكاكنها على حزب العمال.الحاصيلو التجمعيين قاعدين يلمو في ارواحم باش يشدو لبلاد كيما صرح جغام والبوليس السياسي شايخ علينا واحنا نازلين على رواحنا هاو كافر هاو ارهابي ونسينا الي جمعنا الكل نهار 14 جانفي يعني الحرية والكرامة وخاصة اسقاط النظام موش بن علي برك. نرجع للحكاية الليبية قالك تونسي سافر اليبيا ياخي وصل لمدينة .عركة كبيرة في هالمدينة ناس تضرب في بعضها سال واحد قالو: اش ثمة؟ جاوبو السيد : صرامنا في بعضهم .التونسي نرفز وقالو فاش قام لقباحة.جاوبو الليبي:اش من قباحة ياخويا قتلك صرامنا في بعضهمم يعني اولاد مدينة صرمان في بعضهم.(صرمان مدينة ليبية)

سامي الفهري...راشد الغنوشي والسواك الحار

بعد الاخبار متاع الثمانية تلفنلي وقالي اجاني للدار.ايا سيدي مشيتلو:اش بيك اش ثمة؟قالي: تفرجت في الاخبار شي يهبل اكالتهم الموجهة لبن علي ومرتو وزيد المحامي متاعو يجبد علينا بالمرتاح ويختموها بجغام ومرجان ينظرو عالعباد,انا راني قلتها ونعاودها يزي مالرويق واعطو لبلاد لراشد الغنوشي توه يريقلها,لا قضايا مدنية لا عسكرية, يقيم فيها الشرع اكهوة توة ترى:بن علي ومرتو يقتلان رجما خاطر ثبت زناهم قبل زواجهم,الطرابلسية يهدر دمهم خاطر خرجو مالشرع الماطري يصلب بتهمة اللواط,البوليس السياسي يرمى في البحر بتهمة سب الجلالة اما اكا الكلب بن الكلب الي قاعد يحوس ليبر اكا سامي الفهري فيشنق بتهمة ممارسة الميسر القمار في برامجو التلفزية في سيدنا رمضان. راهو زايد الفم الابخر ما دواه كان السواك الحار,اش قولك موش تتريقل لبلاد هكة.قتلو: لا انا معاك اما عالحساب هاذا حكومة راشد الغنوشي ماهي باش تخدم لبلاد كان بعد 23 عام خاطر موش باش تلقى الوقت بين محاكمة بن علي ومرتو وانسابو وزيد كلاب التجمع والبوليس السياسي والسكارة والسهارة وفطارة رمضان والمتبرجين والمتبرجات زيدهم تاركين الصلاة والفنانين والي يعوم في البحر والي يمشي مع مرتو اليد في اليد والي لابسة الدجين... .قالي اش مدخل السهارة والسكارة والناس العياشة في لحكاية.قتلو: السواك الحار متاع الغنوشي يرى كل فم ما يعجبوش فم ابخر.

تونس...طليقة التجمع

الصباح و الرباح دخل للخدمة في حالة حليلة ،يتثاوب،عينيه حمر،واقف بالسيف.خزرت لزميل قديم في الخدمة قتلو :اش بيه السيد؟ضحك و قالي: ماعندك ماريت,السيد ملي طلق مرتو ماعادش راقد الليل.قتلو:هاهو الحب يابو قلب.قالي:قول الكلب و الهبل موش الحب,السيد ملي طلق ولى شاد العسه عالمرا اليل او ماجاب اليل وهو يدور على دارها،يعس عالداخل والخارج ،مرة وصل قيد ماتركيل كرهبة طلعت فيها مرتو وطلب صاحبو بوليس باش يعطيه اسم مولى الكرهبة،حالة حليلة الراجل طلق والمكتوب وفى وهو مكبش كالفقر.قتلو:تي هاو كالتجمع السيد هاذا،تونس طلقاتو للضرر نهار14جانفي وهو لتوه مكبش او مايحبها تعرس بحتى واحد اخر،هاو شعل حبوسات هاو دورها عروشية هاو ضريبة ارهاب والاحلى من هاذا الكل كبدل اللبسة وسمى روحو اكثر من ثلاثين اسم جديد باش ما تعقلوش كيف يجي يخطبها نهار 23اكتوبر.

مالقبر... للنقاب

الحصيلو مااقواه وما اكسح راسو وقداشو حزار ومعقد العربي.في الجاهلية لبنية يؤدها يحفرلها قبرها بيديه ويردمها اما بعد الاسلام اطور شوية ولى يدفن المرا بالحياة يعني يكفنها بنقاب اكحل ويقلها برى ربي معاك.هكه قالي صحيبي وسكت شوية وقالي برجولية الجاهلية خير مالمان يردمها الانثى و يرتاح اما هذوما يحشيو فيه زعمة زعمة سترة النقاب اما في الحقيقة الي يلز فيهم للشي هاذا هو نفس شعور الجاهلي الي يرى بالي لمرا عورة وكان ليه ما يجيب كان الذكر.

دولة المماليك

شي ينطق سي الباجي ولى يشكك و يشلك في الثورة متاعنا .زعمة زعمة ثورة تلقائية غير مؤطرة هيحة متاع شباب. لا يا سي الباجي الثورة موش عفوية وموش صدفة ومؤطرة وعندها زعامات يا سي الباجي.ثورة 14 جانفي سبقتها الحوض المنجمي وبن قردان و الطلبة الي شدو الحبس.الثورة سبقها اسلاميين شدو الحبس ويساريين ناظلو وخرجو مالداخلية كيف خرج بن علي مالبلاد.يا سي الباجي موش انت باش تورينا اش كون راكب عالثورة والا شكون عندو شرعية الزعامة.انت بيدك راكب عالثورة وما عندك حتى شرعية لا دستورية ولا ثورية.انا ما انجم نقول كان هاذي عودة لدولة المماليك ناس جاية من وراء البحار باش تحكم بلادنا.يا سي الباجي جدك الطلياني راهو جابوه من سيسيلي كمملوك باش يشعل سبسي البي ياخي وليتو تحكمو في البلاد وتحكو عالوطنية وزيد تهين في الزواولة الي حرقو ومشاو لارض جدودك ايطاليا وتتهمهم بلي هوما مجرمين هاربين مالحبس.لا يا سي الباجي الي حرقو توانسه حرار الي حرقو هوما الي شهرين التالي لقو صدورهم للكرطوش وطيرو بن علي وقت الي انت تتفرج عالثورة فالتلفزه..يزينا مالرويق اسم بورقيبة ذكرتو اكثر من اسم تونس في اللقاء متاع البارح.قال شنوه انا ما يناقشني حد انا هو الحاكم الفاتق الناطق.ملا لوغة ومالا حديث.

هرب مالقطرة جاء تحت الميزاب

يعجبكشي توه : الشعب دفع الدم باش يسكر الشعب و ويفصل حزب الغنوشي 1 عالدولة، ياخي يجي الغنوشي 2 ويعملنا في كل جامع شعبة وامام من النهضة ويخلطنا الدين بالسياسة.

الله يسترنا مالوبنه والسمنه

اكدت دراسات علمية ان النتائج المباشرة الاولى للتشدد الديني(السعودية نموذجا) هي: الشذوذ الجنسي والسمنه

لليهود وزارة داخلية تحميهم اما لقحاب لا يرد الهراوة عليهم

انا نطالب وزارة الداخلية بان تدين من هدموا وحرقوا واغلقوا المواخير في عدة مدن تونسية.يا خويا اش بيهم الاقحاب تي ماهم يخدمو في اطار قانوني في الجمهورية الي يحكي عليها وزير الداخلية.والله اليهود عندهم اش كون يحميهم البره هذاكه علاش يلزم نددو بلي اعتدى عليهم اما القحاب ما عندهم كان...يزي مالرويق و البولتيك خاطر راهو لو كان نواصلو هكه باش يكسرو البيران والقهاوي ويضربو لبنات الي ماهمش متحجبات قال اشنوه حماية الاخلاق.بشوية بشوية تولي لجان الامر بالمعروف والنهي على المنكر ادور في البلاد.يا وزير الداخلية يزي راهو عيب زعمة خايف مالخوانجية والله تخوف فينا مالخوانجية