بعد اعتقال اربيكا انتقلنا من تونسي و راسي عالي الى تونسي و راسك واطي

طاطي راسك طاطي طاطي

انت ف وطن ديمقراطي

انت بتنعم بالحرية

بس بشرط تكون مطاطي

لما تكون شغال بذمة

خايف على مصلحة الامة

شغلك يطلع من غير لازمة

علشان مبيعلاش غير واطي

طاطي راسك طاطي طاطي

انت ف وطن ديمقراطي

لما حاميها يكون حراميها

و بلاده ورا ظهره راميها

طالع نازل واكل فيها

مسنود بالبدلة الظباطي

طاطي راسك طاطي طاطي

انت ف وطن ديمقراطي

لما شقاك يصبح مش ليك

فقرك سد السكة عليك

تتلفت تلقى حواليك

اما حرامي واما عقاطي

طاطي راسك طاطي طاطي

انت ف وطن ديمقراطي

لما تلاقي بلاد الدنيا

فيها البني ادم حاجة ثانية

و انت في الطبقات الدنيا

قرد مسلسل او وطواطي

طاطي راسك طاطي طاطي

انت ف وطن ديمقراطي

لما الجهلة يبقوا امامك

او فوقك ماسكين في زمامك

و يسوقك ع الهلكة امامك

تشرب م السم السقراطي

طاطي راسك طاطي طاطي

انت ف وطن ديمقراطي

لما الكلمة تكون بتدينك

لما تخبي ف قلبك دينك

لما الذل اشوفه ف عينك

هات احباطك على احباطي

طاطي راسك طاطي طاطي

انت ف وطن ديمقراطي

انت ف وطن ديمقراطي

احمد فؤاد نجم