mercredi 6 janvier 2010

احمد فؤاد نجم: نؤيد سيادتك لفترة جديدة ،،، نكمل خلالها المسيرة السعيدة

نؤيد سيادتك لفترة جديدة
نكمل خلالها المسيرة السعيدة
وبالمرة فيها نبيع الحديدة
مفيش حاجة ثانية نبيعها خلاص
نؤيد سيادتك لاجل المزيد
من اللي تحقق بفضلك اكيد
بقينا خلاص ع الحميد المجيد
وربك لوحده في ايده الخلاص

نبايعك سعادتك ولا حده غيره
كفاية علينا نبرطع في خيره
ونوم شعب مصر العظيمه وشخيره
يقول للحرامي ما تسرق كمان
نبايع سيادته وابنه وحفيده
مفيش زي فكره قديمه وجديده
خرابك يا مالطه حيحصل بايده
ومين فيكي يعني بيسمع اذان
نبوس ايد سيادتك ورجلك كمان
نخليك معانا يا ريس عشان
وجودك ضرورة فرضها الزمان
ومن غير وجودك حقيقي نضيع
دي مصر بتاعتك واحنا ضيوفك
كفايا علينا يا ريس نشوفك
وعاذرين سيادتك وفاهمين ظروفك
عليك بس تؤمر واحنا نطيع
في جزمة سيادتك كلابك يبوسوا
وشعبك ليلاتي يا ريس غموسه
مذله ومهانة و حوجه و مر
لكن يعني ما دمنا شعب انتساب
ودايما و ابدا في حالة غياب
متعملش لينا يا ريس حساب
دي عزبة سيادتك وفيها انت حر
ودستور ما دسترشي موش فارقه خالص
كلام فاضي كله يا فندم بناقص
كفايا علينا الفساد الي ماصص
عرقنا ومعشش و ضارب جذوره
وايه يعني تهري جثثنا البلاوي
يوماتي كوارث.فضايح,رشاوي
كفايا علينا القعاد في القهاوي
بنستنى لما الوريث يجي دوره

2 commentaires:

Unknown a dit…

excellent. au fait , ca s'applique pour tous les arabes. fumez du thé et rester éveillés le cauchemar continu.

subjectif a dit…

بالحق يا اشرف يظهرلي موش كان مصر.الي يوجع هو الاحباط والخيبة والعبث لكبير الي وصلناله والي عبر عليه نجم بطريقة ساخرة هايلة برشة