vendredi 3 juillet 2009

شطر عيشة

يقول الي الدخان يدمر الصحة, اما ما يبطلوش, سقيرة في النهار, كيما يقول هو, ما تعمل شى.الشرب و السياقة ما يتقابلوش بوار او كوندوير لفو شوازير, كيما يقول هو.يستحيل لوكان يمس ادريكسيون بعد ما يشرب اما ما تحلالو السكرة كان في كرهبة صاحبو الي معلا بالوش يشرب و يسوق نورمال. هو لحقيقة متاع ربي ملحد اما يصوم رمضان وكيف يسمع لاذان يقول الله اكبر.الراجل وطني ويكفر بالخليج العربي اما كي وتاتو بعثة عمل خمسة سنين في البحرين ما قالش لا.ذوقو رفيع ياسر في الموزيكا اما كيف يشرب ما يغني كان "يمشي و يجي ويجي ويمشي وينو غزالي وينو هو...".السياسة يموت عليها الرفيق ماليسار متاع قبل ,كيما يقول هو, كيف يحكي على تاريخو اما كل عام يقص وريقة مالشعبة على ما ياتي شكون يعرف.حاصيلو حياتو بكلها شطار: شطر موقف ,شطر حل...شطرعيشة

5 commentaires:

ART.ticuler a dit…

Bravo!

Big Trap Boy a dit…

حلوة برشة

maxulaprates a dit…

يعطيك الصحة .. هذيا لازمها تتكتب في الصفحة الثانية متاع باسبور كل تونسي ..

هوما يقولوا صاحب الشطر موش خاسر ..
أما نساو اللي صاحب الشطر زادة عمره ما ربح ..

Hamadi a dit…

كيف القهوة أشطار و التاي شطر أخضز و شطر أحمر

subjectif a dit…

ART.ticulier
شكرا صديقي ارتيكليه
Big Trap Boy
يحلي ايامك يا Big tra boy

beheeddine
بالحق صاحب الشطر في خطر. بهاء حلوة فكرة انزيدوها للبسبور التونسي معناها هذي صفة وطنية
Hamadi
اي نعم يا حمادي شطار حتى في شربنا وماكلتنا