mercredi 30 juin 2010

قعدة برتغالية


البارح 29 جوان2010 البرتغال و السبنيور لعبو الويتيام دو فينال متاع الكوب دو موند.انا خوكم نحب نعيش الحدث كوم الفو ,اش عملت؟ عملت دوش و اقصدت ربي لبار متاع بورتغاليين.ايا قعدت و طلبت كعبة باردة برتغالية جاية من بورتو PORTO .البار فاضي كيف سالت علاش قالولي راهم برشة يحبو يتفرجو في ديارهم باش يبعدو عالتنرفيز.ايا سيدي تبعت شوية التلفزة نلقاهم حاطين الشان متاع البرتغال واشكون متصدر فيها؟؟؟ الكلب بني الكلب الي كان موش من فكرتو المزمرة راني توه نتفرج على تونس في الكوب دو موند.كويلو المدرب السابق متاعنا يحكي و يحلل قبل ما يبدى الطرح.سالت واحد بجنبي قتلو فاش يقول كويلو؟قالي راهو ينبه و يقول يلزم ناخذو حذرنا مالسبنيور راهم صعاب.ضحكت و قتلو كلامو هو هو حتى كونتر الموزنبيق قالنا خوذو حذركم راهم المزانبقة صعاب,او في جرة كلامو قعدنا خايفين لين تنحينا من كاس العالم.ايا زدت وحيدة باردة اخرى لين بدى الماتش وبداو الجماعة يسبو في الفيفا قالك كيفاش يحطو ارجنتيني حكم ياخي ماهو باش يعاون السبنيور خاطرهم فرد لوغة.ايا وفى الميتون لول تعادل اما البرتغاليين يسبو في كريستيانو رونالدو قالو ما يعمل في شي و قاعد يتبولد تي هو حتى النشيد الرسمي متاعهم ما غناهوش عكس الملاعبية الاخرين الكل.الميتون الثاني لعباد اتحمسو اكثر لكن الهدف الاسباني صب عليهم سطل ماء.سكتو وبداو يتبعو ويعسو عالوقت حتى لين وفى الطرح بعد ماعطى الحكم ورقة حمرا لملاعبي برتغالي.وقفو الكل يسبو و يلعنو اما ثمة واحد مالاول قاعد وحدو ما قال شي وكيف وفى الطرح قلب كاسو و عيط باعلى صوت وهو واقف وايديه هازهم الفوق: اه اه اه.عاودها ثلاثة مرات واخرج.انا زاده كملت كعبتي و خرجت للشارع على صوت الكلاسونات و العياط متاع السبنيور الي خرجو يحتفلو بربحهم.

2 commentaires:

ferrrrr a dit…

حكاية باهية لمقابلة باهية وكعبات باهيين... للبرتغاليين

subjectif a dit…

حتى انا دوب ما كمل الطرح عملت فر فر وخليت البرتغليين يا صديقي ferrr