mercredi 26 août 2009

خويا انجم نشرب

اليوم الخمسه متاع العشية مروح للدار وفي يدي خبزة و باكو لبن و شويه معدنوس للوالده.انا هكاكه لين نسمع واحد ورايا يقول السلام عليكم خزرت ورايا خاطر انا في بلا اوربيه وقليل الي يحكي بالعربي,نلقى شاب عربي تاعب شويه,قربلي و عاود قال السلام عليكم قتلو و عليكم السلام.قالي انجم نشرب.قتلو سامحني ما فهمتكش.قالي انا صايم اما عطشت برشه انجم نشرب؟ما نخبيش عليكم دخلت بعضي حسيت روحي مفتي وعلى اساس جوابي الراجل باش يتصرف,لو كان افتيتلو بالافطار باش نتحمل انا المسؤوليه او لوكان ما نفتيلوش بالافطار و يموت بالعطش مثلا نتسمى انا شجعتو عالموت.قتلو تعرفش كيفاش برا خوذ دبوزه ماء اغسل و جهك و ارتاح في الظل شويه ومن بعد لوكان ماعادش تنجم تصبر اشرب.الراجل طار بالفرحه و دخل للمغازه باش يشري الماء.انا كملت ثنيتي و بعد رجعت نجري باش نقلو هاو ثمه جامع قريب ينجم يمشيلو و غادي ليمام يفتيلو اما خسارة خلطت موخر خاطر ريتو من بعيد شعل سيقارو.كيف روحت للدار قلت مقواك يا بورقيبه شعب كامل افتيتلو بالافطار و انا شاب واحد دخلني بعضي.انا الي قلقني موش حكاية الخوف مالدين اما اني نكون مفتي في حكاية بالنسبة للاخر مصيرية

2 commentaires:

Tarek a dit…

مصيرية من أنا ناحية؟ في بالي إلّي يفطر متعمّد ينجّم يرجّعوا النهار

وزيدالراجل هاو يظهر فيه قريب يموت؟

subjectif a dit…

Tarek
المقصود بالمصيرية انو السيد هاذا يجهل الدين وفي بالو انو افطارو حرام و سماحي لوه بالافطار هو تحليل للي باش يعملو.يعني بالنسبه ليه الافطار كفر يعني الجواب متاعي اما باش يكفرو او يبقي على اسلامه.انا هكه حسيت.