التجديد TV

توه اكثر من شهر كنت وجهت دعوة لحركة التجديد لبذل جهد اكبر واستغلال شبكة الانترنات و خاصة الفايس بوك لفسح المجال لاحمد ابراهيم كي يعبر و لتمكين المواطنين من التعرف على برنامجه والاستماع الى الرجل.صحيح توجدت شوية صفحات و مجموعات في الفايس بوك اما موش كافي.انا ليوم برك كي تفرجت في التجديد تفي و شفت تسجيل لخطاب ابراهيم في نابل وام لعرايس.بكل صراحة خسارة انو موش الناس الكل تنجم تشوف التسجيلات في التجديد تفي.علاش ما وقعش نشرهم في الفايس بوك ؟

لو كان جاء بن علي انترونير

عندي سنين نتفرج عالاحد الرياضي و نتبع في الكورة الحاجة الي شدت انتباهي ان الشعب الفوتبالي قافز و ديمقراطي خاطر كل ما مدرب نتايجوتولى مزمرة وما تمشيش , يثور عليه الجمهور ويطيروه و يجيبو غيرو وهكه تصير الرجة النفسية للملاعبيه وتتحسن النتايج.يعني احنا شعب قلوقجي يستحيل مدرب يفوت خمسه سنين في نادي تونسي.و مدام لحكاية هكه علاش يهبط علينا الصبر في السياسة و نوليو انظرو على اهمية الاستمرارية .زعمه لو كان جاء بن علي انترونير, الفيراج يغنيلو: برا روح يا فقر يا مزيريا والا يقلولو: الله احد الله احد بن علي ما كيفو حد

la Régente de Carthage: la première dame de tunisie déboutée

La première dame de tunisie, leila trabelsi, a été déboutée au tribunal de Grande Instance de Paris dans sa demande d'interdiction de publication et de diffusion du livre La régente de Carthage.
La femme du président avait, en effet, estimé que ce livre comportait "des passages diffamatoires et d'autres injurieux" à son encontre. Ecrit par deux journalistes, Nicolas Beau et Catherine Graciet, ce livre met en exergue le "rôle déterminant" de leila Trabelsi dans la gouvernance de la Tunisie. Les auteurs estiment aussi que la première dame a su placer les membres de "son clan" ( sa famille) à des postes clés.
Le TGI a estimé que leila Trabelsi "n'a pas respecté dans son assignation l'obligation qui pèse sur elle d'indiquer les textes de loi appliquables à la poursuite" ce qui "met les défenseurs dans l'incapacité de savoir exactement ce qui leur est reproché et d'organiser leur défence".
La Régente de Carthage, Main Basse sur La Tunisie est donc bien paru le 1er octobre et a été tiré à 18000 exemplaires. Des compatiriotes sympathisants de la première dame de Tunisie sont venus manifester devant la Découverte (l'éditeur) le jour de la sortie du livre

الرديف موريطانيا و بوركينافاسو

البارح دعاني ربي قلت نتفرج في اخبار تونس سبعة املا في اني نرى حال ناسنا واخويانا في الرديف, لكن دوويو ما ريت كان حديث على صانع التغيير و الطيارة الي بعثها غادي والناس لمساكن الي يشكرو فيه على هاللفته الكريمه .الي هبلني انو من بعد في لاخبار عداو نفس الخبير اما في بلدان اخرى لول طيارة بعثها المعلم لموريطانيا كي العاده شويه كوفيرتات و طريف لسان عصفور و الثاني طيارة لبوركينافاسو بنفس الحموله وكي العاده الناس تشكر في كرم المعلم. اش معناها معناها لوخيان في الرديف محسوبين كسكان موريطانيا او بوركينافاسو, مع احترامنا ليهم, يعني اهل الرديف كيف ايا ناس في دوله شقيقة او صديقه نبعثولهم طيارة مونه كيف تصيبهم كارثه و السلام بالعافيه.لا لا لا موش هكه نتعاملو مع مواطنينين تونسيين منكوبين موش هكه نعاونوهم موش هكه نواسوهم عيب و عار فوق من 20 ضحية يهزهم الماء من غير ما نذكرو اسمائهم عيب نحسبوهم مجرد ضحايا ولا قش هازو الماء.وقتاش باش يصبح التونسي مواطن موش رقم ولا ضحية نطلبو منو يصفق للنظام قبل ما نمدولو يد المساعده.انا كي تفرجت في لاخبار متاع تونس سبعة قلت احنا موش عندنا كارثة في الرديف اما عندنا كارثه اخلاقية في تونس سبعه الي اتاجربمصايب الناس و ضعفهم باش تفتك منهم شكرلبن علي ودعم رخيص لحملتو النتخابية ولهنا نقترح عليهم شعار جديد لحمتلو الانتخابيه: بن علي للممات بالمقرونة و الكوفيرتات.

وينو احمد ابراهيم

ليوم تفرجت في احمد ابراهيم في فرانس 24 على الفايس بوك.ياخي حبيت نعمل طله على حضوره في الفايس بوك.لوجت لوجت شي لا حياة لمن تنادي سي احمد مرشح حركة التجديد للانتخابات الرئاسية يكاد يكون غايب تماما على صفحات الفايس بوك على عكس مرشح التجمع الي يكفي باش تكتب اسمو حتى تغطس في بحر المجموعات و الصفحات الي تحكي عليه. صحيح ثمه صنصره اما بلي يكون ما فهمتش علاش حركة التجديد ما تستغلش الفايس بوك باش تعوض التضيق الي تعاني منو في وسائل الاعلام (باستثناء الطريق الجديد صحيفة الحزب) و بكلنا نعرفو الدور الي لعبو الفايس بوك باش وصل اوباما للبيت الابيض مثلا

الجهة الاخرى خير

ولدو ما يركحش تحطو عاليمين يمشي لليسار تعطيه لعبه يطيشها و يهز لعبه اخرى تركبو يحب يهبط تهبطو يحب يركب تعطيه لامو يحب على بوه تعطيه لبوه يحب على امو.الراجل تحير اسال الطبيبة متاعو اشبيه لوليد,قاتلو ولدك ديمه يتصور الي الجهة لخرى خير.تنهد الراجل و قال من شابه اباه ما ظلم, انا بيدي كيفو: توجهت اداب و كنت نقول العلوم خير ,قريت في معهد عالي وكنت نقول الكلية خير,كنت نصاحب بنية وفيسع نبدلها بصاحبتها,كنت كيف نلبس الدجين نقول القماش خير ونبدل,كيف نسافر ناخو اللواج اما نرجع عالكار كنت نقول بالك راهي خير.كنت نسكر وكيف نروح الفجر للداركيف الكلب نحسد المصلين الي ماشين يصلو بكل تفاؤل و نشاط اما كيف صليت كنت نحس روحي متزهد كلي يستنى في الموت باش يبدى حياتو كنت نحسد السكارى كيف يبدو حافلين و الضحك داز عليهم.كيف كنت بطال ظهرلي الخداما اسعد ناس و كيف خدمت تمنيت نرجع بطال.كيف كنت عازب قلبي يتقبض كيف نرى راجل و مريتو يتمشو والى في الليل كيف صاحبي المعرس يقلي ايا بخاطرك باش نمشي لعزيزتي, اما كيف عرست وليت نبكي على السهريات و اللمات العزابي.كيف كنت في ارض الوطن كنت نحس بروحي في زبلة و كيف هاجرت وليت نرى الوطن احلى بلاد في الدنيا.

خويا انجم نشرب

اليوم الخمسه متاع العشية مروح للدار وفي يدي خبزة و باكو لبن و شويه معدنوس للوالده.انا هكاكه لين نسمع واحد ورايا يقول السلام عليكم خزرت ورايا خاطر انا في بلا اوربيه وقليل الي يحكي بالعربي,نلقى شاب عربي تاعب شويه,قربلي و عاود قال السلام عليكم قتلو و عليكم السلام.قالي انجم نشرب.قتلو سامحني ما فهمتكش.قالي انا صايم اما عطشت برشه انجم نشرب؟ما نخبيش عليكم دخلت بعضي حسيت روحي مفتي وعلى اساس جوابي الراجل باش يتصرف,لو كان افتيتلو بالافطار باش نتحمل انا المسؤوليه او لوكان ما نفتيلوش بالافطار و يموت بالعطش مثلا نتسمى انا شجعتو عالموت.قتلو تعرفش كيفاش برا خوذ دبوزه ماء اغسل و جهك و ارتاح في الظل شويه ومن بعد لوكان ماعادش تنجم تصبر اشرب.الراجل طار بالفرحه و دخل للمغازه باش يشري الماء.انا كملت ثنيتي و بعد رجعت نجري باش نقلو هاو ثمه جامع قريب ينجم يمشيلو و غادي ليمام يفتيلو اما خسارة خلطت موخر خاطر ريتو من بعيد شعل سيقارو.كيف روحت للدار قلت مقواك يا بورقيبه شعب كامل افتيتلو بالافطار و انا شاب واحد دخلني بعضي.انا الي قلقني موش حكاية الخوف مالدين اما اني نكون مفتي في حكاية بالنسبة للاخر مصيرية