Sexe à l'antenne : Ryad punit une chaine libanaise

Mazen Abdel Jawad est un saoudien comme les autres,sauf qu'il a raconté à la télévision ce que tout le monde sait mais que personne ne dit en Arabie Saoudite.Lors de l'émission Ligne rouge, de la chaine libanaise par satellite LBC, Abdel Jawad a détaillé en long et en large sa vie sexuelle, ce qui a eu le don d'irriter les autorités, au point d'ordonner la fermeture des bureaux de la chaîne dans le Royaume.Abdel Jawad,après avoir expliqué avoir eu sa première expérience sexuelle à 14 ans, a raconté comment il faisait pour aborder des femmes dans pays où les espaces de mixité sont rarissimes. Il a notamment expliqué un truc bien connu, consistant à brancher son téléphone sur la fonction Bluetooth; afin de se connecter, dans les shopping malls, avec des Saoudiennes intégralement voilées et accompagnées, dont il récupère ainsi le numéro pour pouvoir prendre rendez-vous ultérieurement. Il a aussi détaillé les aphrodisiaques auxquels il avait recours.L'ironioe du sort, c'est que LBC appartient en partie au prince AL-Walid ben Talal ben Abdelaziz, membre de la famille royale. Quant à l'infortuné Mazen Abdel Jawad, il a été arrêté...
Libération mardi 11 aout 2009

باش نصيف في تل ابيب

لبارح ظهرلي باش نعمل كاس في بار اليهوديه.قعدت عالكونتوار و بديت نحكي انا و شايب مغربي.ايا جات المعلمه سلمت علي و قتلي مازلت ما مشيتش اون فاكونس.قلتلها لا وانت وين مشيت السنا.قتلي اسرائيل.المغربي الي بحذايا دخل بعضو شوي.قلتلها اشنوه الجو غادي؟قتلي موش نورمال كيف نيويورك.قلتلها العيشة غاليه؟قتلي غاليه اما انا عندي العايله في تل ابيب ما يخلوني نصرف حتى شي.قلتلها و الله شهيتني فيها اسرائيل يظهرلي باش نمشي نعمل ايمات غاديكه.انا نحكي مع المعلمه ليهوديه و الشايب المغربي وجهو تلون عشرين لون.كيف خرجت المعلمه قتلو تعرف كوزان انا باش نمشي نتبحبح في تل ابيب و زيد المعلمه اعطتني ادريسة العايله متاعها غاديكه معنتها نمشي واموري في العنبر.نطق الشايب المغربي و قالي والله طحان وموش راجل, اسرائيل يا خاين, ظاقت عليك الدنيا ما لقيت كان اسرائيل.هو يسب و انا نضحك. قتلو يا عمي راني نفدلك حكيت معاها بالعاني باش نشيخ عليك شويه.وقتلو تعرفش كيفاش, مادام مولاة البار هذا يهوديه ,و عندها العايله في فلسطين المحتله ,معناه الفلوس الي نصرفو فيها في بارها تبعثهم هي لعايلتها باش يبنو الديار و يفكو اراضي الفلسطينين لذلك يلزم نقاطعو البار هذايا وكيف احنا ماناش قادرين باش نعاونوا الفلسطنين يا خويا عالاقل ما نكملوش عليهم .

الو ايدك فين

يا خويا البورتابل فسد العلاقات و خرب برشه بيوت والنساء النساء يا خويا هبلهم البورتابل و نساهم في رجالهم. راهي غرايب و عجايب : يطلب نص الليل والا في غرغور القايله"الو ايديك فين" "الو سهير معايا" "الو هيا تجي.." وهات ماكه العسل متاع المكبوتين هذا لو كان طاح ببنية اما لو كان طاح براجل طول يعلق و سعات يزيد يسبو.الحاصيلو احنا نحكيو هكه عل البورتابل و مشاكلو و صحيبنا يسمع ساكت.صاحبنا هذا فتكم بالحديث عمرو 40 سنة عازب و حزار وتجبدلو عالعرس يكرهك في النساء.سكت سكت و نط مالكرسي و قال: والله و الله و الله لمرا الي يسوني بورتابلوها ما تضربوش بشلاكه لاهي مرا عندي انا.

بعد منع الحجاب والنقاب لفرنسيس تلفتو للموزيكا

صاحبي شوفير في شركة نقل في فرانسا.قالي اليوم عالصباح الشاف عملي عرعور خاطر فما كليون عمل فيه ريكلاماسيون.اشنيا لحكاية علاش شكى سي الكليون؟ قالو الشاف شكى فيك خاطر حال اغاني اسلامية في الكار.صاحبي بهت وقالو اول مرة نسمع بحكاية الاغاني الاسلامية والله لو كان قال اغاني عربية معقول اما اسلامية ؟الحق انا نحط في اغاني عربية اما يا شاف لعرب راهي مخلطة فيها المسلمين فيهاالمسحيين وحتى ليهود .قالو الشاف عندك حق اما ثمة عباد موسوسة مالاسلام اش ما تسمع حاجة غريبة تقول ما يكون كان الاسلام.
توه بكل صراحة الحجاب والنقاب و الله ممكن نحكيو فيهم اما لحكاية و صلت للموزيكا معناها غدوه توصل للكلام وتنجم تتحاكم خاطر حكيت بالعربي في مكان عام او في المدرسة وهذا ضد اللائكية و المبادئ الجمهورية وهات ماكه اللاوي.

شطر عيشة

يقول الي الدخان يدمر الصحة, اما ما يبطلوش, سقيرة في النهار, كيما يقول هو, ما تعمل شى.الشرب و السياقة ما يتقابلوش بوار او كوندوير لفو شوازير, كيما يقول هو.يستحيل لوكان يمس ادريكسيون بعد ما يشرب اما ما تحلالو السكرة كان في كرهبة صاحبو الي معلا بالوش يشرب و يسوق نورمال. هو لحقيقة متاع ربي ملحد اما يصوم رمضان وكيف يسمع لاذان يقول الله اكبر.الراجل وطني ويكفر بالخليج العربي اما كي وتاتو بعثة عمل خمسة سنين في البحرين ما قالش لا.ذوقو رفيع ياسر في الموزيكا اما كيف يشرب ما يغني كان "يمشي و يجي ويجي ويمشي وينو غزالي وينو هو...".السياسة يموت عليها الرفيق ماليسار متاع قبل ,كيما يقول هو, كيف يحكي على تاريخو اما كل عام يقص وريقة مالشعبة على ما ياتي شكون يعرف.حاصيلو حياتو بكلها شطار: شطر موقف ,شطر حل...شطرعيشة

تحت الصره شي عجيب

يا ولادي يزي مالتخلويض الغنا متاع قبل اخمج من غنا توه وزيد قبل الناس في لعروسات تسمع لغنا موش كيما توه ولكن حد ما يعلق و يقول هاو كلام خامج و توه على كلمة من نحبوش يصلي نحبو يسكرويغني تقلبت الدنيا وهاني باش نعطيكم مثال غناية من غنا لعروسات قبل :

يا لعميم يا لعمام سهره حلوه يا سلام
يا لعميم خوذ وجيب تحت الصره شي عجيب
نحسابو دقلة وحليب طلعت حلوت بر الشام
يا لعميم يا لعمام سهره حلوه يا سلام
يا لعميم خوذ و هات تحت الصره حلوات
ثمه نقيل ثمه نبات ثمه نعدي سبعه ايام

والي عندو مثال اخر من هالغنا يعمل مزية ينشرو باش نعملو ديوان باهي لاغانينا الشعبية متاع قبل

حكاية واقعية: روميو و جوليت تونس 2009

زوز صغار كالنوار طفل وطفلة عمرهم في العشرين يحبو بعضهم يموتو على بعضهم.ليوم فهمت اش معناه يموتو على بعضهم.الوليد من عرش والبنية من عرش اخر عرش مايعطيش بناتو للبراني حتى لوكان جارهم.يحبها وتحبو يخاف عليها و تخاف عليه هي روحو وهو روحها اما لا مستحيل بنتي نعطيها لبراني هكه قال بو الطفله حاولت فيه كلماتو حكات مع امها اما زايد مستحيل و نهار دخلت للدوش تلفنت لصاحبها و قاتلو حكايتنا و فات وعمري باش يوفى توه باش نحرق روحي وصبت على روحها بدون كاز و شعلت النار.حبيبها في دارو طيش التلفون وشعل النار في بدنوكيما عملت حبيبتو.لبنية ماتت محروقة و لوليد لتوه في الكوما ما بين موت وحيا.حكايتنا واقعية ميا بالميا و صارت هالليمات في البلاد التونسية موش في ايطاليا كيف مسرحية العملاق شكسبير روميو و جوليات.اما الضحايا كيف كيف زوز يحبو بعضهم والاسباب كيف كيف عايلات ما يحبوش بعضهم و النتيجة كيف كيف يموتو العشاق بالسم في روميو و جوليات و حرقا في حكايتنا.وكيما قلت بكري توه فهمت اش معناه نموت عليك يعني و بكل بساطة ننهي حياتي اذا ما تكونش معايا.وكيما قال ابن حزم الاندلسي ومن الحب ما قتل