نحب نمسي عالجماعة

راجل كبير فوق السبعين كبوط و شاشية حمرا فوق الراس شلاغمو قصار ومحجمهم مالفوق يعني شلاغم محففين من شيرة الخشم.قصير يديه في جياب كبوطو دخل يتلبد ووقف قدام بيرو لاستقبال متاع القنصرية القنصلية يا ربي.حاصيلو خزرلو البوليس متاع الاستقبال قصدي عون الاستقبال وقالو: اهلى فلان تفضل ,عندك قضية؟.قالو: لا اما حبيت نمسي عالجماعة وبره.قالو: سامحني اجماعه لاهيين. جبد روحو و استركن يشوف في لعباد, الي يحب على مضمون والي باش يبدل باسبور وهات ماكه الحكيات.الناس الكل قضات شورها كان هو لابد يخزر, اما دوب ما يرى واحد كرز مالمستنيه والا من سلوك الاعوان يتنطر بحذاه و يكسر وذنو يسمع.هالفيه هاذي ما فهمتمهمشي, ناس تهز فالطحين لله لا مصلحة لا عمار بالزور, الراجل خطوتين عالقبر ومازال يقود.زعمه علاش؟ زعمه هو في بالو هاذيكا الوطنيه؟ والا زعمه كيما يقولو ناس قبل رعية غول ؟عاش في الخوف والطحين لين ولات هاذيكا حياتو كيما جماعة 1984 في رواية جورج اروايل